युट्यूब वरून शस्त्रक्रियेचा ‘व्हिडिओ’ पाहून ऑपरेशन; बोगस डॉक्टर कडून उपचार घेतल्याने तरुण महिलेचा मृत्यू

उत्तरप्रदेश 11-12-2025: गंभीर पोटदुखीने त्रस्त झालेली उत्तर प्रदेशातील २५ वर्षांची महिला आपल्या बाराबंकी येथील घराजवळील एका क्लिनिकमध्ये गेली. तिथल्या एका व्यक्तीने स्वतःला डॉक्टर असल्याचे सांगत उपचार सुरू केले. महिलेच्या पित्ताशयात खडे असल्याचा दावा करत तिची शस्त्रक्रिया केली — आणि ही प्रक्रिया या बोगस डॉक्टर ने युट्यूब वरील ‘व्हिडिओ’वरून पाहून केली, असा आरोप तिच्या कुटुंबियांनी केला आहे.

शस्त्रक्रिया चुकीच्या पद्धतीने झाल्याचे सांगितले जात असून, त्या महिलेचा दुसऱ्या दिवशी मृत्यू झाला.

ही घटना ४ डिसेंबर रोजी कोठी परिसरात घडली. महिलेची ओळख मुनीशारा अशी करण्यात आली आहे.

पोलीसांनी सांगितले की युट्यूब वरून शस्त्रक्रियेचा ‘व्हिडिओ’ पाहून ऑपरेशन करणारा ४८ वर्षांचा बोगस डॉक्टर, ज्ञान प्रकाश मिश्रा, आणि त्याचा पुतण्या, ज्याने अनधिकृत शस्त्रक्रियेत त्याला मदत केली, हे दोघेही फरार आहेत. महिलेचे पती तेज बहादूर रावत, यांनी दिलेल्या तक्रारीवरून कोठी पोलीस ठाण्यात दोघांवर खून न मानता मनुष्यवधाच्या गुन्ह्याची नोंद करण्यात आली आहे.

मृत महिलेच्या मागे तिचा पती, जो मजूर म्हणून काम करतो, आणि तीन लहान मुले आहेत.

बोगस डॉक्टर ने युट्यूब वरून प्रक्रिया शिकून शस्त्रक्रिया केली

बाराबंकीचे पोलिस अधीक्षक अर्पित विजयवर्गीय यांनी सांगितले की,

महिलेचा चुकीच्या वैद्यकीय प्रक्रियेने मृत्यू झाला असून तिला उपचारासाठी आरोपीकडे नेण्यात आले होते.

चौकशीत वैद्यकीय पथकाने आरोपीचे पात्रता दस्तऐवज तपासले असता त्याच्याकडे कोणतीही डिग्री नसून तो बनावट डॉक्टर असल्याचे आढळले.

त्याचे क्लिनिक आरोग्य विभागात नोंदणीकृत नव्हते, असेही पोलीसांनी सांगितले.

तसेच,आरोपीने सोशल मीडिया युट्यूबवरून प्रक्रिया शिकून शस्त्रक्रिया केली, या कुटुंबीयांच्या दाव्याची पडताळणी करण्यात येत आहे.

तपास अधिकारी आणि बाराबंकी सर्कल ऑफिसर समीर कुमार सिंह यांनी सांगितले की आरोपीने शस्त्रक्रिया झालेल्या ठिकाणाची जागा बंद करून ठेवली असून तो पळून गेला आहे. त्या दोघांचा शोध घेण्यासाठी पोलिस पथके काम करत आहेत.

‘मी पोहोचेपर्यंत ती मृत झाली होती’

इंडियन एक्सप्रेसशी बोलताना तेज बहादूर म्हणाले की त्यांच्या पत्नीला प्रथम २०१८ मध्ये गंभीर पोटदुखीचा त्रास झाला होता.

तेव्हा त्यांनी तिला एका डॉक्टरकडे नेले होते. सोनोग्राफी केल्यानंतर डॉक्टरांनी त्यांना पित्ताशयात खडा असल्याचे सांगितले होते.

नंतर वेदना कमी झाल्या.

“४ डिसेंबरला माझ्या पत्नीला पुन्हा पोटदुखी सुरू झाली. मी तिला आरोपीकडे नेले. त्याचे क्लिनिक आमच्या दसरापुर येथील घरापासून सुमारे ४ किलोमीटर अंतरावर आहे. त्याने मला सोनोग्राफी करून आणायला सांगितले,” असे तेज बहादूर यांनी सांगितले.

“अहवाल पाहिल्यानंतर आरोपीने सांगितले की पित्ताशयातील खडे वाढले आहेत आणि तातडीने शस्त्रक्रिया करावी लागेल. त्याने मला सांगितले की इतर डॉक्टरांना बोलावले आहे, पण कोणीही आले नाही. मग त्याने स्वतःच शस्त्रक्रिया केली आणि सांगितले की ही प्रक्रिया त्याने सोशल मीडियावरून शिकली आहे,” असा आरोप तेज बहादूर यांनी केला.

ते पुढे म्हणाले की दुसऱ्या दिवशी ते अंघोळ करण्यासाठी थोड्या वेळासाठी घरी गेले असताना आरोपीचा फोन आला. आरोपीने सांगितले की त्यांच्या पत्नीची तब्येत अचानक बिघडली आहे आणि लगेच यायला सांगितले.

“मी क्लिनिकमध्ये पोहोचेपर्यंत ती मृत झाली होती,” असे तेज बहादूर यांनी सांगितले.

कुटुंबाने आणि गावकऱ्यांनी आरोपीच्या क्लिनिकबाहेर आंदोलन केले. उच्चअधिकाऱ्यांनी कठोर कारवाईचे आश्वासन दिल्यानंतरच आंदोलन मागे घेण्यात आले.

Support Jaaglyabharat.com, – Your Small Contribution, A Big Step Towards Change!

जागल्याभारत अतिशय कमी रिसोर्स मध्ये काम करत आहे. दुसरीकडे बलाढ्य मेनस्ट्रिम मिडिया (प्रसार माध्यमे) जी सातत्याने फेक न्यूज चालवत असतात,आणि शोषित वंचित समाजाचे प्रश्न दाबत असतात.त्यामुळे आपल्या मिडियाला बळ दिले पाहिजे.

At Jaaglyabharat.com, we’re committed to bringing you accurate, insightful news that you can trust. By making a small contribution, you help us continue delivering high-quality content, expanding our reach, and staying independent. Every bit of support keeps the news accessible and empowers us to do more.

Thank you for standing with us!

आपल्या जागल्याभारत या युट्यूब चॅनेल ला भेट द्या,सबसक्राईब करा. सपोर्ट करा.