महाबोधी महाविहाराचे संचालन बौद्धांना द्यावे: भदंत ससाई यांनी प्रधानमंत्री मोदींना केले निवेदन

30 मार्च 2025 : नागपूर: प्रधानमंत्री नरेंद्र मोदी यांनी रविवारी सकाळी दीक्षाभूमीला भेट दिली. यावेळी त्यांनी महामानव डॉ. बाबासाहेब आंबेडकर यांच्या अस्थिकलशावर पुष्पांजली वाहिली आणि तथागत गौतम बुद्ध यांच्या प्रतिमेसमोर नतमस्तक झाले. डॉ. बाबासाहेब आंबेडकर स्मारक समिती दीक्षाभूमीचे अध्यक्ष भदंत आर्य नागार्जुन सुरेई ससाई यांनी प्रधानमंत्री नरेंद्र मोदी यांचे स्वागत केले. यावेळी ससाई यांनी बोधगया येथील महाबोधी महाविहाराचे संचालन बौद्धांच्या हाती सोपविण्याची मागणी करणारे निवेदन पंतप्रधानांना सादर केले. तसेच दीक्षाभूमीसाठी अतिरिक्त जागा देण्याचीही विनंती त्यात केली होती.

प्रधानमंत्री मोदींच्या दीक्षाभूमी भेटीचा कार्यक्रम

प्रधानमंत्री मोदी सकाळी ९:३० वाजता दीक्षाभूमीत पोहोचले. सर्वप्रथम त्यांनी डॉ. बाबासाहेब आंबेडकर यांच्या अस्थिकलशावर पुष्पांजली वाहिली आणि वंदन केले. त्यानंतर तथागत गौतम बुद्ध यांच्या प्रतिमेला पुष्प अर्पण करून अभिवादन केले. यावेळी ससाई यांनी त्रिशरण पंचशील म्हटले. दीक्षाभूमी स्मारक समितीतर्फे अध्यक्ष भदंत सुरेई ससाई यांनी प्रधानमंत्री मोदी यांना शाल आणि सोनेरी रंगात कोरलेली दीक्षाभूमी स्तूपाची प्रतिकृती भेट देवून स्वागत केले. तसेच डॉ. बाबासाहेब आंबेडकर यांनी लिहिलेला ‘बुद्ध आणि त्यांचा धम्म’ हा ग्रंथही भेट म्हणून दिला.

महाबोधी महाविहाराचे संचालन बौद्धांना द्यावे: भदंत ससाई

सादर केलेल्या निवेदनात म्हटले होते की, बोधगया हे जगातील सर्व बौद्धांचे पवित्र स्थान आहे. याच ठिकाणी तथागत गौतम बुद्धांना संबोधी प्राप्त झाली होती.

या महाविहाराची निर्मिती सम्राट अशोक यांनी केली होती. १९४९ चा बीटी कायदा रद्द करून महाबोधी महाविहाराचे व्यवस्थापन बौद्धांच्या हाती द्यावे.

तसेच दीक्षाभूमीला येणाऱ्या अनुयायांसाठी जागा अपुरी पडत असल्याने

माता कचेरी आणि कॉटन रिसर्च सेंटर येथील २१ एकर जागा दीक्षाभूमीला देण्यात यावी, अशी विनंती निवेदनात करण्यात आली होती.

प्रधानमंत्री नरेंद्र मोदींचा संदेश

प्रधानमंत्री मोदी यांनी दीक्षाभूमीतील नोंदवहीत आपला संदेश लिहिताना म्हटले, “डॉ. बाबासाहेब आंबेडकर यांच्या पंचतीर्थांपैकी एक असलेल्या नागपूर स्थित दीक्षाभूमीला भेट देण्याचे सौभाग्य लाभल्याने मी भारावून गेलो आहे. या पवित्र स्थळाच्या वातावरणात बाबासाहेबांच्या सामाजिक समता, समानता आणि न्यायाच्या तत्त्वांचा अनुभव येतो.” त्यांनी यावर भर देत म्हटले की, “दीक्षाभूमी आपल्याला गरीब, वंचित आणि गरजूंसाठी समान हक्क आणि न्यायाच्या व्यवस्थेसह पुढे जाण्याची ऊर्जा प्रदान करते.”

विशेष वैशिष्ट्ये

प्रधानमंत्री नरेंद्र मोदी हे दीक्षाभूमीला दोन वेळा भेट देणारे पहिले प्रधानमंत्री ठरले आहेत. यापूर्वी १४ एप्रिल २०१७ रोजी त्यांनी दीक्षाभूमीला भेट दिली होती. तेव्हा त्यांनी दीक्षाभूमीवर ध्यानसाधना केली होती. यावेळी मात्र त्यांनी ध्यान केले नाही, परंतु बुद्धवंदना ग्रहण केली. या कार्यक्रमात मुख्यमंत्री देवेंद्र फडणवीस, केंद्रीय मंत्री नितीन गडकरी, राज्याच्या मुख्य सचिव सुजाता सौनिक, स्मारक समितीचे सदस्य डॉ. राजेंद्र गवई, विलास गजघाटे, एड. आनंद फुलझेले, एन.आर. सुटे, दादाराव दाभाडे उपस्थित होते.

Support Jaaglyabharat.com, – Your Small Contribution, A Big Step Towards Change!

जागल्याभारत अतिशय कमी रिसोर्स मध्ये काम करत आहे. दुसरीकडे बलाढ्य मेनस्ट्रिम मिडिया (प्रसार माध्यमे) जी सातत्याने फेक न्यूज चालवत असतात,आणि शोषित वंचित समाजाचे प्रश्न दाबत असतात.त्यामुळे आपल्या मिडियाला बळ दिले पाहिजे.

At Jaaglyabharat.com, we’re committed to bringing you accurate, insightful news that you can trust. By making a small contribution, you help us continue delivering high-quality content, expanding our reach, and staying independent. Every bit of support keeps the news accessible and empowers us to do more.

Thank you for standing with us!

आपल्या जागल्याभारत या युट्यूब चॅनेल ला भेट द्या,सबसक्राईब करा. सपोर्ट करा.