१४ मार्च रोजी होणारी MPSC ची पूर्व परीक्षा अवघ्या ३ दिवस आधी पुढे ढकलण्यात आल्यामुळे आता परीक्षार्थी उमेदवारांमध्ये मोठा रोष पाहायला मिळू लागला आहे. एमपीएससीच्या या निर्णयाचा निषेध करण्यासाठी पुण्यामध्ये मोठ्या संख्येने विद्यार्थी आता रस्त्यावर उतरले आहेत. नवी पेठेमध्ये मोठ्या संख्येने रस्त्यावर उतरून विद्यार्थ्यांनी रास्तारोको सुरू केला आहे. सुरुवातीला अलका चौकातून सिंहगड रोडकडे जाणाऱ्या रस्त्यावर दोन्ही बाजूला विद्यार्थ्यांनी रास्तारोको केला होता. पण पोलिसांनी एका बाजूची वाहतूक सुरू केली असली, तरी दुसऱ्या बाजूला विद्यार्थी मोठ्या संख्येने गोळा होऊन एमपीएससीच्या या निर्णयाविरोधात जोरदार घोषणाबाजी करताना दिसत आहेत.
महाविकास आघाडी सरकारच्या घटक पक्षांमध्ये मतभेद
दरम्यान MPSC ची पूर्व परीक्षा पुढे ढकलण्यावरून महाविकास आघाडी सरकारच्या घटक पक्षांमध्ये मतभेद असल्याचे समोर आले आहे. कॉँग्रेसने परीक्षा रद्द करण्याच्या निर्णयाचा विरोध करत थेट निषेध केला असून कॉँग्रेसचे महाराष्ट्र राज्य युवक अध्यक्ष सत्यजीत तांबे यांनी निर्णय बदलावा असे म्हटले आहे. “एमपीएससीची परीक्षा अचानकपणे पुढे ढकलण्याचा जो निर्णय आज झाला आहे, त्याचा मी जाहीर निषेध करतो. इतर सर्व परीक्षा होत असताना फक्त एमपीएससीच्या परीक्षा पुढे ढकलल्या जाणं हे चूक आहे. सरकारने तातडीने हा निर्णय बदलायला हवा. परीक्षेच्या ३ दिवस आधी परीक्षा पुढे ढकलल्या जाऊ शकत नाहीत”, अशी प्रतिक्रिया त्यांनी दिली आहे.
सरकार विद्यार्थ्याच्या भावनांशी खेळत आहे
आंदोलनकर्त्या विद्यार्थ्यांपैकी एक विद्यार्थी उमेदवार म्हणाला की , कोरोना रुग्णांची संख्या मोठ्या प्रमाणात वाढत असताना देखील मे महिन्यात यूपीएससीची परीक्षा झाली. आता तर कोरोना लस उपलब्ध असताना सरकारने ऐनवेळी एमपीएससी परीक्षा पुढे ढकलली आहे.हे सरकार विद्यार्थ्याच्या भावनांशी खेळत आहे. मागील दोन वर्षांपासून एमपीएससीची परीक्षा झालेली नाही. आता आम्ही करायचे काय? असा सवालही या विद्यार्थ्याने उपस्थित केला.
चिडलेल्या विद्यार्थ्यांनी ठाकरे सरकार मुडदाबाद च्या घोषणा यावेळी दिल्या.
विशेष बाब म्हणजे सरकारने परीक्षा पुढे ढकलल्याचे जाहीर प्रसिद्धी पत्रक काढले आहे.
मात्र पुढील परीक्षा दिनांक यशावकाश जाहीर करण्यात येईल असे कळविण्यात आले आहे.
त्यामुळे पुढील परीक्षा दिनांक कधी असेल याबाबत सुद्धा सुनिश्चितता नाही.

MPSC पूर्वपरीक्षा सुधारित तारीख
जागल्या भारत वरील बातम्या/लेख शेअर करून इतर लोकांपर्यंत पोहोचण्यास आम्हाला मदत करा.मित्रांना सांगा.
वाचकहो..@jaaglyabharat या टेलिग्राम चॅनेलवर सहभागी व्हा,ताज्या अपडेट्स मिळवा
First Published on March 11 , 2021 17 :10 PM
WebTitle – mpsc aspirants protesting in pune as prelim exams postponed again